"Fonetika e gjuhës shqipe" është pasqyrë e rezultateve më të fundit në fushën e studimeve për fonetikën e gjuhes shqipe. Ajo merr parasysh rezultatet e arritura deri më sot për fonetikën e shqipes dhe kërkon t'i çojë ato më tutje.Vepra është përgatitur si tekst për studentët e filologjisë që ndjekin kursin e fonetikës së gjuhës shqipe. Duke qenë se libri u drejtohet studentëve të vitit të parë, paraqitja e problemeve është e thjeshtësuar.Teksti synon t'u japë studentëve normën fonetike të shqipes standarde. Pra, ai është normativ dhe, si i tillë, nuk paraqet variantet territoriale ose shoqërore.Vepra trajton aspektin nyjëtimor, akustik dhe funksional të tingujve të shqipes standarde. Ajo niset, pra, nga mënyra e realizimit të tingujve në ligjërimin e përditshëm për të kaluar pastaj në funksionin e tyre gjuhësor.Është një vepër referimi jo vetëm për studentët e shkollave të larta, por edhe për të gjithë ata që janë të interesuar të njohin për së afërmi fonetikën e shqipes standarde.Autori është doktor i Universitetit të Parisit III Sorbone, në fushën e fonetikës dhe ka një përvojë të gjatë në fushën e studimeve për fonetikën e shqipes.