Një baba besimtar që vdes i tillë, por kur kalon në botën e përtejme nuk gjen atë që priste; një shoqëri e përzier me njerëz që duan Lindjen, por edhe Perëndimin, duan modernen si edhe traditën; një imam që jo rastësisht quhet Patrik dhe një botë e përtejme krejt tjetër nga ajo e librave të shenjtë. Kjo është ajo që na paraqet Mustafa Nano në librin "Selam Aleikum Baba". Adili është personazhi qëndror. Ch është emri artistik i qytetit ku zhvillohen ngjarjet. Është një qytet në Shqipërinë e Mesme, është shprehur Nano për mediat, një ditë më parë. Romani “Selam aleikum baba” mund të gjendet në libraritë e kryeqytetit. Nano si publicist jo pak herë është vënë në qendër të vemendjes duke krijuar situate çmitizuese, më tepër se provokime “fetare”. Ndoshta ngacmuar shpesh edhe nga debatet publike i ka dhënë dorë për t’u sprovuar edhe në roman, duke lënë hapësirë për të tërhequr lexuesin drejt një bote që jo pak herë ka çuar në ngasje debatesh.