Ky botim përfaqëson kulmin e një veprimtarie mbi gjashtë dekada të autorit në fushën e mbrojtjes dhe restaurimit të trashëgimisë kulturore. Njëkohësisht, ai ofron një sintezë të thelluar të përvojës profesionale dhe reflektimit teorik mbi konceptet kyçe të ruajtjes së monumenteve, në raport me zhvillimet ndërkombëtare dhe veçantitë kontekstuale shqiptare.Vepra strukturohet në disa kapituj themelorë që përshkojnë evolucionin historik të koncepteve të monumentit dhe restaurimit, nga praktikat tradicionale deri në formalizimin e teorive bashkëkohore, praktikat konkrete të ndërhyrjes restauruese, ku përmes studimeve të detajuara të rasteve (banesa qytetare dhe fshatare, monumente kishtare, ansamble urbane dhe manastire në Shqipëri dhe Greqi), autori argumenton qasjen kritike dhe metodologjinë e përdorur. Gjithashtu teksti analizon përballjen me sfidat e rijetëzimit, autenticitetit dhe ruajtjes së shtresëzimeve historike, në funksion të balancimit mes ruajtjes së trashëgimisë dhe nevojave bashkëkohore të përdorimit.Në tërësi, "Praktika e Vlerësimit të Monumenteve" është më shumë se një përmbledhje teknike, ai shërben si një dokument historik, si një reflektim metodologjik dhe si një udhërrëfyes për brezat e rinj të studiuesve dhe profesionistëve të fushës së trashëgimisë kulturore. E pajisur me përmbledhje dhe përkthim në anglisht, si dhe me një aparat të pasur ilustrues (foto, skica, planimetri), vepra është e orientuar jo vetëm për publikun vendas, por edhe për komunitetin ndërkombëtar të restaurimit dhe studimeve të trashëgimisë..