Ndërkohë, rruga drejt pavarësisë dukej si një tunel pa dritë në fund. Ashtu si Gandi, Rugova ishte kundër përdorimit të dhunës. Trembej se Serbia e Sllobodan Millosheviçit do të ndërmerrte një masakër të tmerrshme mbi popullin e Kosovës, edhe pse Presidenti George Bush i vjetër kishte hequr "një vijë në rërë", "a line in the sand", siç e quanin amerikanët, paralajmërimi se një ndërhyrje e Serbisë në Kosovë nuk do të tolerohej.Aso kohe, ishte në modë që ne gazetarët ta pyesnim Rugovën se si mund të arrihej pavarësia me mjete paqësore, siç predikonte ai.Përgjigjja e tij ishte e pandryshuar: Kemi Amerikën dhe NATO-n, ata do të na ndihmojnë; ne do t'i kërkojmë të drejtat tona në mënyrë paqësore.