PISA është një program ndërkombëtar për vlerësimin e nxënësve të moshës 15-vjeçare në tri fusha kryesore: shkencë, matematikë dhe lexim. Ai filloi të zbatohej për herë të parë në vitin 2000 dhe bëhet një herë në çdo tre vjet.Korniza mbi të cilën bëhet vlerësimi i njohurive shkencore synon të kuptojë sa i aftë është nxënësi të arsyetojë për një hulumtim shkencor, sa arrin të identifikojë konceptet kyçe të informacioneve shkencore, sa arrin të përshkruajë dukuritë natyrore në mënyrë shkencore, sa është në gjendje të interpretojë provat shkencore dhe të nxjerrë përfundime të qarta, sa është i aftë të gjykojë për ndikimin që kanë shkenca dhe teknologjia në shoqëri. Shoqëria e sotme i vlerëson njerëzit jo thjesht për aq sa dinë, por në radhë të parë për sa dinë të bëjnë. Ky synim mund të arrihet përmes kultivimit të mendimit të lirë e kritik, bashkërendimit të njohurive, frymës së debatit dhe shpirtit të inovacionit.Përgjithësisht, testet janë hartuar për të vlerësuar dijet për ndërtimin dhe vetitë e lëndëve, ndryshimet atmosferike, ndryshimet kimike e fizike, shndërrimet e energjisë, njohuritë për forcën dhe lëvizjen, për formën dhe funksionin, biologjinë humane, shëndetin dhe sëmundjet, biologjinë e mjedisin, ndryshimet fiziologjike, biodiversitetin, njohuritë për trashëgiminë, ekosistemet, bioteknologjinë, si dhe Tokën e vendin që ajo zë në univers.