Portret i artistit në rini, serializuar më 1914-1915 dhe botuar më 1916 në New York, gjurmon kapërcimin e personazhit kryesor, Stivën Dedalus nga fëmijëria në rini. "Portreti" është romani i parë i një prej kolonave të modernizmit botëror. Pati një jetë të gjatë dhe të vështirë si dorëshkrim, i nisur më se një dekadë më herët, i punuar e ripunuar disa herë nga autori në lëvizjet e tij nëpër Europë, i hedhur madje edhe në zjarr e i shpëtuar mrekullisht nga të afërmit e autorit. Botimi i tij dhe i përmbledhjes me tregime "Dublinasit", e vendosën Joyce-in në plan të parë të letërsisë së kohës, duke i paraprirë botimit të kryeveprës së tij "Uliksit" më 1922.