Nga Jeruzalemi në Illyricum kam kryer sherbimin e Krishtit (Ep. Palit - Romakeve, 15:19). Dhe mbasi kishin kaluar nëpër Amfipoli dhe nëpër Apoloni, arritën në Selanik (Veprat e Apostujve 17:1). Kur të dergoj Artemin ose Tihikun, eja sa me shpejt tek unë në Nikopojë. sepse vendosa ta kaloj dimrin aty (Ep. Palit - Titit 3:12). Ati i përkthimit kanonik Shën Jeronimi, i njohur ndër shqiptarë si Shën Gjeri, njoftonte, qysh në shekullin IV, se Ungjilli i Krishtit, cum Paulo in Illyrico, ishte predikuar in omnibus locis versabatur. Këto pohime gjenden në letrat e ungjilltareve të mëdhenj'. Në hapësirën iliro-shqiptare krishterimi u predikua prej nxënësve të Krishtit qysh në mesin e shek. I. Fan Noli, një shekull më parë, shtronte pyetjen nëse Shën Pali kishte predikuar në hinterlandin proto shqiptar në ilirisht apo në latinisht, sepse që të kishte predikuar greqisht apo aramaisht e quante krejt të përjashtuar.