Hardcover Pjesë nga studimi : DETAJET METALIKE TË PORTAVE NË QYTETET SHQIPTARE Ndër detajet arkitekturore të banesës qytetare, që paraqesin vlera artistike dhe që meritojnë studim të veçantë, janë edhe elementet e aplikuara te portat. Këto i takojmë me shumicë në qytetet tona: Elbasan, Gjirokastër, Shkodër, Tiranë, Krujë etj. Këto detaje metalike, së bashku me pjesët e tjera me vlerë artistike të godinës qytetare (gdhendjet në gurë, dru, format në suva etj.) janë elementet plastike të aplikuara në banesën popullore. Ato flasin për një sens artistik të zhvilluar, për një aftësi të veçantë të lidhjes së arteve të aplikuara me arkitekturën. Fondi i arteve të aplikuara popullore, kështu, pasurohet edhe me këto detaje, të cilat janë plot fantazi, pasuri mendimi e ritmi dhe kanë një forcë stilizuese herë-herë për t'u admiruar. Punimet artistike të hekurit janë të shumta në banesë, që nga ato të përdorimit të përditshëm: zinxhirë për të varur, mbajtëse drush, deri në ato të vendosura në banesë si kangjella dritaresh e ballkonesh, dyer etj.