E drejta ndërkombëtare private ka një potencial të jashtëzakonshëm, pasi është e drejta që lidh ligje të shteteve të ndryshme. Është ajo degë e së drejtës që i jep mundësi zbatimi normave të degëve të tjera të së drejtës. Në këtë kuptim është një degë që ka shumë rëndësi. Kjo rëndësi me vlerë të shtuar në rastin e Shqipërisë, si një vend në ndryshim të vazhdueshëm, ku sa vijnë e shtohen marrëdhëniet juridike me elemente të huaja. Rritja e numrit të të huajve që jetojnë në Shqipëri, rritja e numrit të martesave të shtetasve shqiptarë me shtetas të huaj, rritja e numrit të lindjeve jashtë vendit të fëmijëve me prindër me shtetësi shqiptare, rritja e investimeve të huaja, shtimi i numrit të shoqërive tregtare të zotëruara dhe/ose të drejtuara nga të huaj, por edhe shtimi i përfaqësive diplomatike dhe konsullore në Shqipëri, rrisin numrin e marrëdhënieve me elemente të huaja dhe mandej atë të mosmarrëveshjeve me elemente të tilla.