-Ç'është kjo djerme, tha. Epidemi pagjumësie. Nuk lyp më kush valium. As dyfishi i dozës nuk ndikon fare. Le që edhe valiumi u sos. - Ndonjë më të fortë, ke? Mundësisht leng, ta thithë trupi menjëherë. Le të jetë i idhet zeher. Mjafton të fle pak. Midis turbullirës iu shfaqën sytë e gruas, që i shqiptoi këto fjalë. Aq të rrëmbushur i kishte, sa dukej sikur do t'i derdheshin përnjëherësh. Përreth mollëzave përhapej ulurima e një vuajtjeje të brendshme. Mollëzat kishin marrë diçka nga nata. Nga hëna e saj. Nata ia merr gjumin, ajo ia merr hënën. O Zot, sa e bukur qe!