Gjithçka lind nga një akt dashurie. Bota vetë zë fill ashtu, Gjithë gjindja sot, pas rraskapitjeve e molisjeve, i drejton përsëri sytë e shpirtit kah Rumiu për të ndier e shijuar këtë përvojë të mrekullueshme, çliruese e shëruese. Himnet më të bukura kushtuar dashurisë, lartësisë së shpirtit, bukurisë sublime, të fshehtave të kozmogonisë shndrisin këtë herë në kopshtin e Rumiut, sjellë në shqipen e rrjedhshme të Agron Islamit, përmes një leksiku të larmishëm, të saktë dhe një sintakse të pastër e të ëmbël. Përpos kënaqësisë së leximit, kemi përpara një libër me vlerë të shumëanshme: një vlerë njerëzore, një udhërrëfyes, një ekuilibër të dëshiruar për të përballuar çdo lloj sfide psikologjike e shpirtërore të kohëve moderne që po i jetojmë. Ky libër që shfletojmë rrit vetëdijen e njerëzimit sepse është i shkruar nga një mistik, nga një njeri i ndriçuar, i cili, për fat shumë të mirë na shfaqet në rrathë të dritës të epokës sonë e flet në gjuhën tonë me gjuhë zemre.