Me një artikull në dorë paraqitesh në drejtorinë e fletores "La Parole Libre" një djalosh shqipëtar njëzetvjeçar; një shqipëtar i ri paraqitesh në zyrat e një fletoreje të Parisit për të kërkuar një të drejtë, për të mprojtur një komb të shtypur, por liridashës. Atë që i vlonte në zemër, djaloshi e kishte hedhur në ca letra, ku çfaqte hidhërimin dhe zemërimin e vet dhe të bashkëvendasvet kundrejt robërisë turke dhe Murat Be Çerqezit. Shqipëtari i ri i Konicës shprehu ahere shpirtin e vet t'egërsuar, e në të drejtë, ai çfaqi shpirtin e lirë kundra një shtypësi prapanik e mizor. Djaloshi që do të drejtonte më vonë revista e gazeta të dëgjuara paraqitesh më 1895 në redaksinë e fletores frënge. Ishte artikulli i parë i një flamurtari të fletorizmës shqipëtare. Ishte shkrimi i parë i një burri që punoi një jetë të tërë për zgjimin e për qytetërimin e vendit të vet. 1895: data kur filloi të shkruajë e të flasë Faik Konitza për të drejtat shqipëtare dhe për kombin e robëruar, më 1895 filloi Faik Konitza të fliste e të shkruante dhe më 1942 si për nga hera. Vetëm vdekja e largoi nga puna dhe nga vendi. Më 1895: dit'e shënuar për historinë e lëvizjes. Dit' e shënuar për jetën e këtij luftëtari të mendimit duke patur "me palcën e luanëve", i ngjeshur me një kulturë të rrallë dhe me një shpirt polemisti, i cili, për pallë pati pendën, kulturën, diturinë dhe prirjen e ndritur të kritikut... Lefter L. Dilo.