Gjirokastra tashmë e ka një album të saj Turizmi sot, kudo në botë, po kthehet në një industri fitimprurëse,ku përveç vlerave që mund të ketë një vend i dëshiruar për t’u vizituar, ka nevojë të madhe për shumë promovim. Ka ardhur koha që edhe në Shqipëri,e cila është mbartëse e bukurive të rralla natyrore dhe e një trashëgimie të pasur kulturoro-historike, të eci më tej në këtë drejtim. Në këtë kontekst, dëshiroj që t’iu vë në dijeni sot mbi botimin e albumit fotografik “Gjirokastra" Ky album i konceptuar si një vepër ka si qëllim kryesor prezantimin dhe promovimin e bukurive të Qarkut të Gjirokastrës, me objekt kryesor këtë qytet të magjishëm, i cili përfshin qytetin historik, por dhe segmente të tjera të këtij qarku si Përmeti,Bënja,Tepelena, Nivica, Dropulli,Lunxheria,Zagoria, Çajupi etj. Në këtë strukturë artistike janë zgjedhur pamje nga qyteti historik i Gjirokastrës, muzeumet, kalaja, urat, kishat e bukura bizantine,xhamitë e vjetra historike,shtëpitë qytetare të këtij qyteti me vlera të theksuara historike dhe kulturore,rrugët tipike mes lagjeve, shtëpitë që duken siku rrinë mbi njëra-tjetrën,kalldrëmet e vjetra karakteristike,portat e mëdha prej druri,oborret e ngrohta që shoqëronin vendbanimet mesjetare dikur,dritaret që shoqëronin shtëpitë e radhitura me një asimetri të rrallë. Të gjitha këto prezantojnë një jetesë kulturore dhe qytetare që e ndesh shumë rrallë dhe me siguri do të ngjallin kureshtje tek turistët e huaj që dëshirojnë të vizitojnë Shqipërinë në dimër dhe në verë. Në këtë mënyrë ky album do të mund të pasqyrojë një pjesë të bukurive të rralla të Shqipërisë, siç është Gjirokastra,qyteti përrallor i librit ”Kronikë në Gurë” të Ismail Kadaresë, në mbrojtjen e UNESKO-s ,bukuritë e mrekullueshme që kemi edhe pse jemi një vend i vogël, por me trashëgimi kulturore dhe historike interesante, e cila është e njohur fare pak, sidomos nga të huajt.Albumi është në shqip dhe në gjuhë të huaj (anglisht) shoqëruar me një hyrje mga znj. Lindita Rova, Kryetare e Këshillit rë Qarkut të Gjirokasrës, por gjithashtu edhe me disa citime pikante nga shkrimtari madh Ismail Kadare për pamje të veçanta që prezantohen. . Për fat të keq për Gjirokastrën deri më sot ne ende nuk kemi patur një album të tillë dhe ky album mendoj se do ishte një kontribut që plotëson një boshllëk. Shtëpia botuese Plejad dhe unë si ideator i kësaj vepre që në bashkëpunim realizuam përgatitjen dhe botimin e tij falelënderojmë thellësisht Ministrinë e Kulturës, Këshillin e Qarkut të Gjirokastrës dhe Abi Bank, të cilët u treguan të pa kursyer dhe na ndihmuan financiarisht sidomos sivjet në kushtet e pandemisë për botimin e tij, duke i bërë një shërbim të drejtërdrejt promovimit të trashëgimisë sonë historike ,kulturore dhe natyrore. Turizmi mbetet përfituesi kryesor i këtij botimi promovues.